Чăваш халăхĕн авалтан пыракан йăла-йĕркипе, сăвă-юрăллă, вăйă-ташăллă уявĕсемпе паллаштарас, ачасене тăван халăх йăли-йĕркине тытса пыма хăнăхтарас, шкул ачисен тăван халăх чĕлхипе литературине, историпе культурине вĕренес кăмăлне çĕклес тĕллевпе Хĕрлĕ Чутай шкулĕнче иккĕмĕш хут «Аваллăхсăр малашлăх çук» фестиваль иртрĕ. Фестивале Тăван чĕлхе кунне тата Раççей Федерацийĕн Çемье çулталăкне тата Чăваш Республикин Экологи культурипе çут çанталăка перекетлес çулталăкне халалласа Чăваш Республикин вĕренӱ институчĕ тата Хĕрлĕ Чутай муниципалитет округĕн Хĕрлĕ Чутай вăтам шкулĕ йĕркелерĕç.

Шăмат кун, нарăс уйăхĕн 17-мĕшĕнче, Хĕрлĕ Чутай вăтам шкулĕнче ирех хăнасем «Аваллăхсăр малашлăх çук» фестивале пуçтарăнчĕç. 10 районăн 33 шкулĕпе ача садĕнчен килнĕ хăнасене 8Б класра вĕренекенсен фольклор ушкăнĕ юрă-ташăпа кĕтсе илчĕ. Ун хыççăн хăнасем «Чăваш эрешĕпе Хĕрлĕ Чутай тумĕ» куравра, «Арçынсен ал ĕç ăсталăхĕ»; «Çут çанталăк тата экологи», «Чăваш пÿрчĕ. 20-мĕш ĕмĕр» музейсенче, «Ÿсен-тăран пÿлĕмĕ», «Хĕрарăмсен ал ĕçĕ» ăсталăх лаççисенче пулчĕç.

Экскурси хыççăн Хĕрлĕ Чутай вăтам шкулĕн директорĕ Вероника Архипова фестивале уçрĕ, ĕмĕрсем тăршшĕпе тытса пынă ырă йăла-йĕрке аваллăхра кăна ан юлтăр тесе пăшăрханнине пĕлтерчĕ. Уява хутшăнакансене çавăн пекех Хĕрлĕ Чутай муниципалитет округӗн ертÿçи Иван Михопаров, унăн çумĕ – вĕренÿ пайĕн пуçлăхĕ Игорь Живоев, Чăваш Республикин вĕренӳ институчĕн чăваш чĕлхипе литература кафедрин ертÿçи Анна Егорова, Хĕрлĕ Чутай ентешлӗхĕн ертӳҫи Владимир Савинкин, Чӑваш Республикин муниципалитет пӗрлӗхӗсен канашӗн ӗҫ тӑвакан директорӗ Александр Кузнецов, Чӑваш наци конгресӗн «Чăваш хĕрарăмĕ» комитечĕн председателĕ Юлия Мареева саламларĕç.

Ун хыççăн хĕрÿ тупăшу пуçланчĕ, фестивале хутшăнакансем хăйсен пултарулăхĕпе çичĕ ăмăртура паллаштарчĕç.

«Çемье йăли-йĕрки – çирĕп çемье никĕсĕ» ăмăртура вăтам тата аслă классенче вĕренекенсенчен йĕркеленĕ фольклор ушкăнĕсем хăйсен тăрăхĕнчи йăла-йĕркене кăтартса пачĕç.

«Халăх юрри – чунăм уççи» ăмăртура вăтам тата аслă классенче вĕренекенсем чăваш халăх юррине юрларĕç.

«Ай, ташлар-и ташшине…» ăмăртура шкулчченхи вĕренÿ организацийĕсенче тата 1-11-мĕш классенче вĕренекенсем чăваш ташшине ташласа кăтартрĕç.

«Çĕнĕ варкăш» ăмăртура 2-11-мĕш классенче вĕренекенсем хăйсем çырнă сăвăсене пăхмасăр пултаруллă каласа пачĕç.

«Халăх йăли – пурнăç йĕрки» ăмăртура вĕрентекенсем чăваш халăх йăли-йĕркине тĕпе хурса уроксемпе урок тулашĕнчи ĕçсем ирттерчĕç.

«Ăста аллинче ĕç вылять» ăсталăх лаççинче 5-11-мĕш классенче вĕренекенсен алă ĕçĕ туса кăтартрĕç.

«Пирĕн çемьен юратнă чăваш апачĕ» ăмăртура 1-11-мĕш классенче вĕренекен ачасем хăйсен çемйипе хатĕрленĕ чăваш апат-çимĕçĕ çинчен каласа пачĕç.

Уяв савăнаçлă та хаваслă иртрĕ. Вăл тĕрлĕ район шкулĕсен вĕренекенĕсемпе вĕрентекенĕсене, ашшĕ-амăшне, власть тата культура тытăмĕнче вăй хуракансене пĕрлештерчĕ. Фестиваль пирĕн ачасем халăхăмăрăн иртнĕлĕхĕпе кăсăкланнине, хамăрăн ырă йăла-йĕркене ытларах пĕлес тенине çирĕплетсе пачĕ.

*     *     *

17 февраля в Красночетайской средней школе Красночетайского муниципального округа состоялся второй фестиваль «Без прошлого нет будущего», посвященный Дню родного языка, Году семьи в Российской Федерации и Году экологической культуры и бережного природопользования в Чувашской Республике.

Фестиваль организован БУ ЧР ДПО «Чувашский республиканский институт образования» Минобразования Чувашии и МАОУ «Красночетайская средняя общеобразовательная школа» Красночетайского муниципального округа в целях сохранения культурного наследия чувашского народа, приобщения детей к чувашской национальной культуре, обычаям и традициям чувашского народа, к его духовно-нравственным ценностям, поддержание творческой активности педагогов,

В фестивале приняли участие обучающиеся и педагоги 33 дошкольных и общеобразовательных школ из 10 муниципальных округов Чувашской Республики.

Участники фестиваля представили свое творчество в семи состязаниях.

Фестиваль прошел празднично, весело и интересно! Он объединил учеников и учителей школ разных муниципальных округов, родителей, государственных служащих и работников культуры. Говорят, что у народа, не знающего своего прошлого, нет будущего. Наши учителя и ученики показали прекрасное знание культуры, обычаев и традиций родного народа. Значит, у нас есть будущее.