Шупашкарти 60-мĕш шкул вĕрентекенне Надежда Кузнецовăна «Пурăн, чăваш тĕрри» Пĕтĕм Раççейри конкурсăн Тĕп парнине тивĕçнĕ ятпа саламлатпăр
2025 çулхи чӳк уйăхĕн 26-мĕшĕнче «Пурăн, чăваш тĕрри» Пĕтĕм Раççейри конкурсăн çĕнтерӳçисене чысларĕç. Кăçал конкурса Ҫӗнтерӳпе патриотлăх çулталӑкне халалланӑ, унӑн теми – «Улӑпӑн тӗрленӗ хӑвачӗ». Шупашкарти 60-мĕш шкулта пуçламăш классене тата чăваш чĕлхипе литературине вĕрентекен Надежда Кузнецова Тĕп парнене (Гран-прие) тивĕçрĕ. Надежда Михайловнăна çирĕп сывлăх, вăрăм ĕмĕр, телейлĕ кун-çул, çитĕнӳ хыççăн çитĕнӳ сунатпăр!
Н.М. Кузнецова – пултаруллă вĕрентекен. Ĕçтешĕсемпе пĕрле Чăваш Республикин вĕренӳ институтĕнче квалификаци ӳстерекен учительсем валли мастер-классем йĕркелет, институт ирттерекен мероприятисене хастар хутшăнать. Вăл Пĕтĕм Раççейри «Русь мастеровая», «Пурӑн, чӑваш тӗрри», республика тата хула шайĕнчи нумай-нумай конкурсра мала тухнă, Чăваш Республикин халăх ӳнер промыслисен ăстин ятне тивĕçнĕ. Надежда Кузнецова ертсе пыракан класра вĕренекенсем те, вăл ертсе пыракан «Асамлă тĕрĕ» клубра тата «Тĕрĕ тĕнчи» кружокра ăсталăхне туптакан тĕрĕçĕсем те Раççей, республика, хула шайĕнчи тĕрлĕ конкурссен çĕнтерӳçисем пулса тăнă.
Надежда Михайловнăн пурнăç çулĕ çинче малашне те пултаруллă та хастар вĕренекенсем тĕл пулччăр, унăн Раççей тата тăван республика шайĕнче çĕнĕрен те çĕнĕ чыс-хисепе тивĕçмелле пултăр!
