«Шкулчченхи вĕренÿ организацийĕсенче ĕç-хĕле чăвашла йĕркелемелли инноваци мелĕсем» программăпа пĕлĕве ÿстермелли курс вĕçленчĕ
Чăваш чĕлхине упраса хăварас ĕçе ача пахчинченех çирĕп йĕркепе туса пымалла, ачасене мĕн пĕчĕкрен чăвашла, тăван чĕлхепе ăс памалла. Çавна май Чăваш Республикин вĕренÿ институчĕ шкулчченхи вĕренÿ организацийĕсемпе «Тăван чĕлхе – анне чĕлхи» проекта йĕркелесе пырать. Проектпа килĕшÿллĕн ача пахчисенче ĕçлекен педагогсем кашни çулах пĕлĕве ÿстермелли курссенче, семинарсенче, ăсталăх лаççисенче хăйсен ăсталăхне туптаççĕ.
2025 çулхи юпа уйăхĕн 10-мĕшĕнчен пуçласа чÿк уйăхĕн 11-мĕшĕччен ача сачĕсенче ĕçлекен воспитательсем «Шкулчченхи вĕренÿ организацийĕсенче ĕç-хĕле чăвашла йĕркелемелли инноваци мелĕсем» программăпа пĕлĕве ÿстермелли курсра вĕренчĕç. Курса Вĕренÿ инситучĕн чăваш чĕлхипе литератури кафедри йĕркелесе пычĕ.
Анна Егорова, Тамара Артемьева доцентсем ертсе пынипе педагогсем вĕренÿпе воспитани ĕç-хĕлне тăван чĕлхепе йĕркелесе ирттерессин теорипе практика никĕсĕсене тишкерчĕç, чăваш чĕлхин вăрттăнлăхĕсемпе паллашрĕç, шкул çулне çитмен ачасен чăвашла пуплевне аталантарас ĕçре ашшĕ-амăшĕпе ĕçлемеллли мелсемпе майсем çинчен пĕлчĕç, чăвашла занятисем ирттерес хăнăхусене алла илчĕç.
