Вĕренӳ ĕçченĕсен çулсерен иртекен августри конференцийĕ çурла уйăхĕн 18-мĕшĕнче хăйĕн ĕçне пуçларĕ. Паян республикăн пĕтĕм кĕтесĕнчи 50 ытла чăваш чĕлхипе литература вĕрентекен Чăваш Республикин вĕренӳ институтĕнче пуçтарăнчĕ. Вĕсем «Тăван чĕлхесене хальхи вăхăтра вĕрентессин çивĕч ыйтăвĕсем: педагогăн професси ӳсĕмĕн ориентирĕсем» секци ларăвне хутшăнчĕç.

Секци ĕçне Чăваш Республикин вĕренӳ институчĕн проректорĕ Инесса Ядранская йĕркелесе пычĕ. Вăл çитес вĕренӳ çулĕнче «Тăван чĕлхе (Раççей Федерацийĕнчи халăхăн чĕлхи) тата/е Раççей Федерацийĕнчи республикăн патшалăх чĕлхи», «Тăван чĕлхепе (Раççей Федерацийĕнчи халăхăн чĕлхипе) çырнă литература вулавĕ», «Тăван литература (Раççей Федерацийĕнчи халăхăн чĕлхипе çырнă литература)» вĕренӳ предмечĕсене вĕрентес ĕçе мĕнлерех йĕркелесси пирки ăнлантарчĕ.

Чăваш Республикин вĕренӳ институчĕн чăваш чĕлхипе литература кафедри пуçлăхĕн тивĕçĕсене пурнăçлакан Анна Егорова, Шупашкар хулин 40-мĕш вăтам шкулĕнчи чăваш чĕлхипе литература вĕрентекен Александр Степанов, Шупашкар хулин сывлăх енчен хавшакрах вĕренекенсене пĕтĕмĕшле пĕлӳ паракан 2-мĕш шкулти чăваш чĕлхипе литература вĕрентекен Ираида Матьянова, Шупашкар муниципалитет округĕн Мăнал вăтам шкулĕнчи чăваш чĕлхипе литература вĕрентекен Анжела Московцева, Шупашкар хулин 33-мĕш вăтам шкулĕнчи чăваш чĕлхипе литература вĕрентекен Ирина Диарова тăван чĕлхемĕрпе литературăна вĕрентес ĕçри çивĕ ыйтусемпе тухса калаçрĕç.

Секци ларăвне хутшăнакан вĕрентекенсем доклад тăвакансене нумай ыйту пачĕç, чунĕсене ыраттаракан ыйтусем çине хурав тупма тăрăшрĕç. Тухса калаçакансем кашни ыйту çинех туллин хуравларĕç. Тăван чĕлхене вĕрентес ĕçе чунтан парăннă учительсем паянхи лару тухăçлă, усăллă иртнине палăртрĕç, Чăваш Республикин вĕренӳ институтне тав турĕç.