2025 çулхи нарăс уйăхĕн 15-мĕшĕнче Хĕрлĕ Чутай шкулĕнче Тăван чĕлхе кунне, Раççей Федерацийĕн Тăван çĕршыв хÿтĕлевçин çулталăкне, Чăваш Республикин Çĕнтерÿпе патриотизм çулталăкне халалланă «Аваллăхсăр малашлăх çук» республика шайĕнчи III фестиваль иртрĕ.

Фестиваль тĕллевĕпе задачисем:

- чăваш халăхĕн авалтан пыракан йăла-йĕркипе, сăвă-юрăллă, вăйă-ташăллă уявĕсемпе паллаштарасси;

- ачасене тăван халăх йăли-йĕркине тытса пыма хăнăхтарасси;

- шкул ачисен тăван халăх чĕлхипе литературине, историпе культурине вĕренес кăмăлне çĕклесси;

- вĕрентекенсен паха опытне тупса палăртасси, унпа ыттисене паллаштарасси.

Фестивальте Чăваш Республикин шкулчченхи вĕренÿ организацийĕсен тата пĕтĕмĕшле пĕлÿ паракан тĕп/вăтам шкулĕсен ушкăнĕсем ăмăртрĕç.
Пурĕ 37 шкултан тата ача сачĕсенчен, 12 муниципалитет округĕнчен фестивале хутшăнма кăмăл турĕç. Хăнасене фольклор ушкăнĕ юрă-ташăпа кĕтсе илчĕ. Унтан вĕсене  шкулпа паллаштарма экскурси йĕркелерĕç. Хăнасем «Хĕрлĕ Чутай тумĕ аваллăхран паянлăха», «Паттăрлăхпа мухтав», «Чăваш апат-çимĕçĕ», «Чăваш мунчи» куравсенче; «Тĕрĕ-эреш пÿлĕмĕ», «Экологи», «Чăваш пÿрчĕ. 20-мĕш ĕмĕр» музейсенче пулчĕç.

Фестивале Хĕрлĕ Чутай вăтам шкулĕн директорĕ Вероника Архипова  уçрĕ, ĕмĕрсем тăршшĕпе тытса пынă ырă йăла-йĕрке аваллăхра кăна ан юлтăрччĕ тесе палăртрĕ. Фестивале хутшăнакансене Хӗрлӗ Чутай муниципалитет округӗн пуҫлӑхӗ И.Н. Михопаров, Хĕрлĕ Чутай муниципалитет округĕн вĕренÿ начальникĕн заместителĕ И.Н. Живоев, Чăваш Республикин вĕренӳ институчĕн ăс пару технологийĕсен кафедрин ертÿçи, педагогика ăслăлăхĕсен кандидачĕ С.Г. Игнатьева доцент, Хĕрлĕ Чутай «Чавал» ентешлӗхĕн  ертӳҫи В.М. Савинкин, Чӑваш Республикин муниципалитет пӗрлӗхӗсен Канашӗн ӗҫ тӑвакан директорӗ А.Н. Кузнецов, Чӑваш наци конгресӗн «Чăваш хĕрарăмĕ» комитечĕн председателĕ  Ю.П. Мареева, Чăваш наци конгресӗн çумĕнчи чăваш чĕлхи учителĕсен пĕрлешĕвĕн ертÿçи Г.Л. Никифоров саламларĕç. Вĕсем  пурте тăван чĕлхен пĕлтерĕшĕ пирки калаçрĕç.

Кăçал «Аваллăхсăр малашлăх çук» фестиваль сакăр ăмăртуран йĕркеленчĕ:

1. «Çемье йăли-йĕрки – çирĕп çемье никĕсĕ» (вăтам тата аслă классенче вĕренекенсен фольклор ушкăнĕ чăваш халăхĕн хăй тăрăхĕнчи пĕр-пĕр йăли-йĕркине кăтартса пани).
2. «Халăх юрри – чунăм уççи» (вăтам тата аслă классенче вĕренекенсем чăваш халăх юррине юрлани).
3. «Ай, ташлар-и ташшине…» (шкулчченхи вĕренÿ организацийĕсенчи ачасем тата 1-11-мĕш классенче вĕренекенсем чăваш ташши ташлани).
4. «Çыру çырсамăр салтаксем патне» («Сăвăллă çыру» тата «Прозăллă çыру» номинацисем).
5. «Ăста аллинче ĕç вылять» (5-11-мĕш классенче вĕренекенсен алă ĕçĕ тума вĕрентекен ăсталăх класĕ).
6. «Пирĕн çемьен юратнă чăваш апачĕ» (1-11-мĕш классенче вĕренекен ачасем хăйсен çемйипе пĕрле чăваш апат-çимĕçне кăтартни).
7. «Мухтав сана, çĕнтерÿçĕ салтак» секци (2-11-мĕш классенче вĕренекенсен «Çĕнтерÿ кунĕ ачасен куçĕпе» ÿкерчĕкĕсен куравĕ.).
8. «Халăх йăли – пурнăç йĕрки» (вĕрентекенсем чăваш халăх йăли-йĕркине тĕпе хурса уроксемпе урок тулашĕнчи ĕçсем ирттерни). Ăмăртăва пурĕ 24 вĕрентекен хутшăнчĕ. Уроксем çÿллĕ шайра иртрĕç.

«Аваллăхсăр малашлăх çук» фестиваль Чутай муниципалитечĕшĕн кăна мар, пĕтĕм республикăшăн пĕлтерĕшлĕ чăвашлăх уявĕ пулчĕ! Чутайра чăвашлăх туйăмĕ упранать тесе çирĕппĕнех калама пултаратпăр. Фестивале йĕркелесе ирттернĕ Хĕрлĕ Чутайри вăтам шкул ертÿçине В.Н. Архиповăна, педагогсене, унта хутшăннă пур çынна та пысăк тав. Пĕрлĕхре – вăй. Пурте пĕрле туслă ĕçлесен, пĕр-пĕрне пулăшса пырсан – чăваш халăхĕ малашне те  вăй илсе  аталанса пырĕ.

Çĕнтерÿçĕсемпе призерсен списокĕ