Кашни ашшĕ-амăшĕ хăйĕн ачине сывлăх, ăс-тăн, телей сунать. Ачасем çут тĕнчене тÿрех сывлăхлă, ăслă, телейлĕ килеççĕ-ши? Мĕн тесен те, пуррине те салатма пулать, ҫуккинчен те пур тума пулать. Мĕнле ачана эпир ăслă ача тетпĕр? Çынна мĕн илем кÿрет? Пĕр чĕлхе – пĕр ăс, икĕ чĕлхе – икĕ ăс пулать-ши? Мĕнле чĕлхе вăл тăван чĕлхе? Пирĕн ачасем кăна мар, мăнуксем те чăвашла калаçчăр тесен мĕн тумалла?

Ҫакă тата ытти ыйтусене сÿтсе явас тĕллевпе Чăваш Республикин вĕренÿ институчĕ хăйĕн Rutube-каналĕнче «Пĕрле ларса калаçар-ха» рубрика уçать. Ăна чăваш чĕлхипе литератури кафедри тата Ашмарин центрĕ йĕркелесе пынипе Шупашкар хулин хавшак сывлăхлă ачасене пĕлÿ паракан 2-мĕш шкулĕнче чăваш чĕлхипе литературине вĕрентекен Ираида Матьянова ертсе пырĕ. Вăл Тăван чĕлхе, çав шутрах вырăс чĕлхи те, вĕрентекенсен Раççей шайĕпе иртекен ăста урокĕсен конкурсĕн «Ăста вĕрентекен» номинаци çĕнтерÿçи, «Чăваш Енри патшалăх организацийĕсенчи чи ăста вĕрентекен» конкурсăн çĕнтерÿçи, Вырăс патшалăх чĕлхи тата Раççей Федерацийĕ халăхĕсен тăван чĕлхисене вĕрентекенсен меслетлĕх ĕçĕсен конкурсĕн лауреачĕ, Чăваш çыравçисен союзĕн пайташĕ.

Ираида Васильевна хăйĕн калаçăвĕнче ачасемпе аслисен хутшăнăвне кăтартакан видеороликсемпе усă курĕ. Паянхи видеороликра Андреева Алина, Элĕк районĕн Ефремкасси ял вулавăшĕн тĕп библиотекарĕ, хăйĕн Дима ывăлĕпе, Элĕк шкулĕн 6-мĕш класс ачипе, пулĕ. Алина Васильевна – виçĕ ача амăшĕ, виçĕ мăнук кукамăшĕ.

Çĕнĕ хыпарсемпе сайта, «Контактра» хутшăну тетелĕн «Чăваш чĕлхи – чĕкеç чĕлхи» тата «ЦНППМ «Ашмарин-центр» ушкăнĕсене кĕрсе паллашăр.