Нумаях пулмасть Чăваш кĕнеке издательстви 8-мĕш тата 9-мĕш классем валли «Чăваш литератури» вĕренÿпе вулав кĕнеки хатĕрлесе кăларчĕ. Вĕренÿ кĕнекисене А.А. Ядрицова тата И.В. Ядранская авторсем Федерацин патшалăх стандарчĕпе килĕшÿллĕн пĕтĕмĕшле пĕлÿ паракан вĕренÿ организацийĕсенче усă курма хатĕрленĕ.

Вĕренÿ кĕнекисем халăх сăмахлăхĕн тĕслĕхĕсемпе илемлĕ литература тексчĕсенчен тăраççĕ. Малтан вĕренекенсем чăваш халăх пултарулăхĕпе, унтан çынлăхпа çыхăннă, ырăпа усала палăртма, вĕсене уйăрма, çынна хисеплеме вĕрентекен илемлĕ хайлавсемпе паллашĕç.

«Чăваш литератури» вĕренÿпе вулав кĕнекисен пахалăхĕ – пайсене (темăсене) тата кĕске теори материалне икĕ чĕлхепе, чăвашла тата вырăсла йĕркелени, кашни хайлав хыççăн уйрăм словарь ĕçĕ, ыйтусемпе ĕçсем тата илемлĕ вулама хăнăхмалли ĕçсем сĕнни. Кашни урокрах, хайлавсене вуласа паллашнă хыççăн, авторсем ачасен пĕлĕвне çирĕплетме ыйтусемпе ĕçсем хатĕрленĕ, вĕреннине тĕрĕслемелли ыйтусем палăртнă, илемлĕ вулама хăнăхтармалли ĕçсем сĕннĕ. Вĕренекенсен тавра курăмĕпе ăс-хакăлне аталантарма пултарулăх тата проект ĕçĕсем пур.

Ачасен пĕтĕмĕшле пĕлĕвне тĕрĕслеме «Вĕреннине пĕтĕмлетни» пай кĕртнĕ.

Çывăх вăхăтрах шкулсем çак çĕнĕ вĕренÿ кĕнекисемпе пуянланĕç. Авторсем «Чăваш литератури» кĕнеке 8-мĕш тата 9-мĕш класра вĕренекенсемшĕн чăн-чăн пĕлÿ çăлкуçĕ пулса тăрасса шанаççĕ.